《讀者投稿》
我其實都忍左我99好耐，雖然結婚得幾年，但我同我老公結婚之前已經一齊左七八年，間唔中都有同佢屋企人接觸，咁我表面當然都冇咩野啦，話曬戈時都未結婚，都唔可以對人地屋企人有咩要求。但無論婚前定婚後我99都做左太多我睇唔過眼既野，又食煙，又覺得自己對人好，成日都無回報等等。我忍到我個小朋友而家出埋世終於知道尼個人唔可以再一直住落去，如果唔係c6係孝順仔，我諗真係冇咩人頂得佢順。
婚前我同c6討論過不如我地去睇下樓，婚後兩個人一齊住，c6都同意既，但始終我地唔識點揀樓，c6就叫左6299一齊去睇樓，都有講明係買多一個單位，而我99戈時都話好，本身我地諗住睇電梯樓，因為住唐樓有時老人家上落真係冇咁方便，但唔知點解6299睇睇下話唔中意電梯樓，話都係唐樓好喎，之後仲未經我c6同意就睇左一間所謂佢中意既單位落左細訂。然後c6 梗係嬲啦，為左咁同佢屋企人嘈左一論，點知最後戈個唐樓單位係超出左原本既預算，搞到最後都係要賣左舊戈個單位黎換樓。另外舊樓賣戈時人地講價平幾十萬得唔得，點知99又未問過c6就答應左人地。為左買樓賣樓既事c6俾我99激左好多次，之後99仲要嬲番c6轉頭，我真係唔知可以俾咩反應我99，佢根本係人間極品。
然後今年我地個小朋友出世，咁我生之前c6就話「不如你番外家坐月啦，咁你應該會坐得舒服啲，我唔想你生完之後辛苦，同埋我驚你產後抑鬱呀。」因為本身我屋企人都錫我，所以佢地話番去坐月都冇問題，仲話我地咁樣可以慳番啲錢唔洗請月嫂，佢地包食包住咁照顧我地，我除左本身每個月出糧俾佢地之外，我額外俾錢佢地都仲唔收，話自己仔女邊會計咁多，叫我地留番啲錢買野俾小朋友仲好，戈時我聽到我真係喊左出黎，因為唔知自己前世做左咩屋企人可以對自己咁好。但相反，我99一聽到我話番外家坐月，佢就即刻話到時小朋友出世我就番鄉下（佢啲親戚大部份都係鄉下），c6即刻就話「咁你未番囉，你有手有腳中意去邊我地阻止唔到你」然後99就即刻黑曬面唔出聲。同埋大肚戈時99成日話我戈個一定係仔，邊會陀女，由一開始大肚講到生佢都係咁講，我真係好反感，因為我同c6都覺得仔女冇所謂，62都話仔女一樣，唯獨佢成日都話我陀戈個一定係仔。
我c6不嬲都唔會特別慶祝生日，但我之前都會買蛋糕俾佢過下生日，因為今年我坐緊月所以冇特別去買到，c6都話有個小朋友已經就最大既禮物。但99生左c6三十年都冇買過生日蛋糕俾佢食，唔知點解今年99死都要買蛋糕同c6慶生，之後因為c6番工時間唔固定正日戈日切唔到蛋糕，99就以為佢故意唔食佢個蛋糕，為左咁又嬲左c6。最後嬲到話要同c6斷絕關係，c6為左咁仲崩潰咁喊左一大場（尼一次係我同佢一齊咁多年第二次見佢喊，第一次係佢隻狗入醫院）。
我個極品99實在做太多好事，之後有機會再同大家呻下，共勉之💪🏻
＃我的極品四大長老
Search